ՄԱԿ-ի հայկական ասոցիացիան և "People in Need" կազմակերպությունը հայտարարում են "Ճամպրուկ" միգրացիոն հիմնախնդիրների վերաբերյալ լրագրողական ամենամյա մրցույթ: Մրցույթը նպատակ ունի միավորել Երևանի և մարզերի ԶԼՄ-ների ներկայացուցիչների ներուժը միգրացիոն հիմնախնդիրների լուսաբանման շուրջ և խրախուսել ոլորտի հիմնահարցերը բարձրաձայնող լրագրողներին: Մրցույթին կարող են մասնակցել Երևանի և ՀՀ բոլոր մարզերի լրատվամիջոցների ներկայացուցիչներն ու անկախ լրագրողները: Յուրաքանչյուր լրագրող կարող է ներկայացնել մեկից ավելի լրագրողական նյութ` հայերեն և/կամ ռուսերեն լեզուներով:
Ոլորտի մասնագետներից և լրագրող-փորձագետներից կազմված ժյուրին երեք` լավագույն հեռուստահաղորդում, լավագույն ռադիոհաղորդում, լավագույն հոդված անվանակարգերում կընտրի մեկական մրցանակակիր: Յուրաքանչյուր անվանակարգում կհանձնվեն նաև վկայականներ և դրամական պարգևներ.
1-ին տեղ` 180 000 դրամ
2-րդ տեղ` 90 000 դրամ
3-րդ տեղ` 45 000 դրամ:
Ընտրության չափանիշներն են`
• Հոդվածները, հեռուստա- և ռադիոհաղորդումներն ու հոդվածները պետք է հրատարակված կամ հեռարձակված լինեն 2010 թվականի դեկտեմբերից մինչև 2011 թվականի նոյեմբեր ընկած ժամանակահատվածում:
• Նյութի բովանդակությունը պետք է լինի հանրությանը մատչելի:
• Նյութերում պետք է պահպանված լինեն լրագրողական էթիկան և հեղինակային մոտեցումը:
• Ընտրված թեման պետք է լինի սպառիչ և հարցի շուրջ պարունակի համակողմանի տեղեկատվություն:
Մասնակցության համար անհրաժեշտ է ներկայացնել 2011 թվականի մայիսի 1-ից մինչև 2011 թվականի հոկտեմբերի 31-ը միգրացիոն թեմաներով պատրաստած հեռուստահաղորդումներ, ռադիոհաղորդումներ, մամուլի հրապարակումներ և ինտերնետային պարբերականներում ներկայացված հոդվածներ:
Դիմում-հայտերի ընդունման վերջնաժամկետը 2011 թվականի նոյեմբերի 10-ն է (մինչև ժամը 18:00-ն):
Միգրացիոն հիմնախնդիրների վերաբերյալ "Ճամպրուկ" լրագրողական մրցանակաբաշխությունը նվիրված է Միգրանտների միջազգային օրվան, որն ամեն տարի նշվում է դեկտեմբերի 18-ին:
Մրցույթը կազմակերպվում է "Հայաստանում միգրացիոն հոսքերի կառավարման հզորացում" ծրագրի շրջանակներում, որն իրականացվում է Եվրոպական Հանձնաժողովի և Չեխիայի կառավարության ֆինանսական աջակցությամբ:
Ավելին`
այստեղ
