Հայոց ցեղասպանության 95-րդ տարելիցի կապակցությամբ Հայոց ցեղասպանություն թանգարան-ինստիտուտը նախաձեռնել է մի շարք գիտական միջոցառումներ, ցուցադրություններ, կոնֆերանսներ: Մշտական ցուցադրությունից բացի, թանգարան-ինստիտուտը սփյուռքի նախարարության հետ համատեղ կկազմակերպի երկօրյա կոնֆերանս` մշակութային ցեղասպանություն թեմայով: Ապրիլի 23-ին թանգարանի սրահում կբացվի բացառիկ ցուցադրությունը, որտեղ տեղ են գտել թանգարանի գիտաշխատողների վերջին 2 տարվա հավաքչական աշխատանքների արդյունքները: Թանգարան-ինստիտուտի տնօրեն Հայկ Դեմոյանը նկատում է, որ ցուցանմուշները ցուցադրվում են առաջին անգամ ու ներկայացնում փաստերի հսկայական հավաքածու:
Թանգարան-ինստիտուտի խոշոր նախագծերից մեկը կառույցի ընդարձակումն է, որտեղ կլինի նաեւ նոր ու ավելի լայնածավալ ցուցադրություն: Ժամանակավոր ցուցադրությունների սրահում կներկայացվեն Հայոց ցեղասպանության մասին արտասահմանյան հեղինակավոր մամուլում տեղ գտած 40-50 բացառիկ հոդվածներ: «Այս ցուցադրությունը կփաստի, որ Հայոց ցեղասպանությունը միշտ էլ գտնվել է արտասահմանյան հեղինակավոր մամուլի ու վերլուծաբանների ուշադրության կենտրոնում», ասաց Դեմոյանը:
Թանգարան-ինստիտուտը հայոց ցեղասպանության միջազգային ճանաչմանն ուղղված եւս մեկ կարեւոր գործ է նախաձեռնել: Կհատկացվեն դրամանշնորհներ այն արտասահմանցի ուսանողներին, ովքեր ցանկանում են մասնագիտանալ Հայոց ցեղասպանության հարցում: Կրթաթոշակը կկրի Ռաֆայել Լեմկինի անունը, հենց նրա, ով քննելով 1915-ին Օսմանյան կայսրությունում կատարված վայրագություններն ու ջարդերը, առաջին անգամ արտաբերեց «Հայոց ցեղասպանություն» եզրույթը:
Աղբյուր` Ազգ
